کوئٹہ: میکانگی روڈ کے قریب فرنٹیئر کور (ایف سی) کی گاڑی کے قریب دھماکے میں 2 افراد جاں بحق اور متعدد زخمی ہوگئے۔
پولیس کے مطابق کوئٹہ کے میکانگی روڈ پر دھماکے میں ایف سی کی گاڑی کو رش والے علاقے نشانہ بنایا گیا، دھماکے کی جگہ بارودی مواد نصب کیا گیا تھا۔
اسپتال ذرائع کا کہنا ہے کہ دھماکے کے متعدد زخمیوں کو سول اسپتال منتقل کیا گیا جہاں زخموں کی تاب نہ لاتے ہوئے 2 افراد جاں بحق ہوگئے جبکہ دھماکے میں 14 افراد زخمی ہوئے۔
اسپتال ذرائع کے مطابق اسپتال میں ایمرجنسی نافذ کرکے طبی عملے کو طلب کرلیا گیا ہے۔
پولیس کے مطابق دھماکے سے قریبی عمارتوں کے شیشے ٹوٹ گئے اور کئی گاڑیوں کو نقصان پہنچا۔
دھماکے کے مقام کو سیکیورٹی فورسز نے گھیرے میں لے لیا اور واقعے کی تحقیقات کی جارہی ہیں۔
صوبائی وزیر داخلہ ضیاء لانگو نے ایف سی کی گاڑی کے قریب دھماکے کی شدید مذمت کرتے ہوئے کہا کہ ملک دشمن عناصر امن و امان کو خراب کرنے کی کوشش کررہے ہیں۔
انہوں نے ہدایت کی کہ بم دھماکے میں زخمیوں کو بہترین طبی سہولیات فراہم کی جائیں۔