وزیراعظم کا دورہ شمالی وزیرستان، دانش اسکول سسٹم اور یونیورسٹی بنانے کا اعلان

وزیراعظم شہباز شریف نے آج شمالی وزیرستان کا دورہ  کیا جہاں سول اور عسکری حکام کی جانب سے وزیراعظم کو بریفنگ دی گئی۔

وزیر اعظم نے شمالی وزیرستان میں جرگے سے خطاب کرتے ہوئے کہا مشران کو اسلام آباد بلا کر مسائل کا حل نکالیں گے، وزیرستان کے بچوں کیلئے دانش اسکولز سسٹم بھی بنائیں گے۔

وزیراعظم نے شمالی وزیرستان میں یونیورسٹی بنانے کا بھی اعلان کیا۔

قبائلی عمائدین نے وزیراعظم سے وزیرستان کو ٹیکس فری زون قرار دینے کا مطالبہ کیا۔ مشران نے کہا کہ غلام خان بارڈر  پر کاروبار کو وسعت دینے کیلئے وہاں سے کسٹمز ختم کیا جائے۔

علاوہ ازیں پاک فوج کے ترجمان ادارے انٹرسروسز پبلک ریلیشنز (آئی ایس پی آر) کی جانب سے جاری اعلامیے کے مطابق وزیراعظم شہباز شریف کی میران شاہ آمد پر آرمی چیف جنرل قمر جاوید باجوہ نے انہیں خوش آمدید کہا۔

آئی ایس پی آر کے مطابق وزیراعظم نے شہداء کی یادگار پر پھول چڑھائے اور فاتحہ خوانی کی۔

 آئی ایس پی آر کے مطابق وزیراعظم کو علاقے کی سکیورٹی صورت حال پر تفصیلی بریفنگ دی گئی اور سرحد پار سے ہونے والی دہشت گردی کی کارروائیوں سے آگاہ کیا گیا۔

آئی ایس پی آر کے مطابق وزیراعظم نے دہشت گردی کی کمر  توڑنے پر پاک فوج کے افسران اور جوانوں کو خراج تحسین پیش کیا۔

انہوں نے کہا کہ زیادہ وقت نہیں گزرا کہ دہشت گرد مردوں، عورتوں، بچوں، تعلیمی اداروں اور سرکاری اداروں کو ملک بھر میں بلاامتیاز نشانہ بنا رہے تھے۔ مسلح افواج کی دلیرانہ کوششوں اور قوم کی حمایت کی وجہ سے ہم ہر قسم کی دہشت گردانہ تنظیموں کو شکست دینے میں کام یاب ہوئے ہیں۔

وزیراعظم شہباز شریف نے کہا کہ اس کاوش میں پوری قوم متحد کھڑی ہے اور ہم متحد ہو کر کام یاب ہوں گے۔