چیف آف آرمی اسٹاف جنرل سید عاصم منیر نے اس بات پر زور دیا ہے کہ مسلح افواج قوم کی حمایت کے ساتھ کسی بھی خطرے سے نمٹنے کے لیے مادر وطن کی سرحدوں کے دفاع پر توجہ مرکوز کیے ہوئی ہے۔
انٹر سروسز پبلک ریلیشنز (آئی ایس پی آر) کی جانب سے جاری کردہ ایک بیان کے مطابق جنرل عاصم منیر نے بہاولپور کور کی فیلڈ مشقوں کا مشاہدہ کرنے کے لیے خیرپور ٹامیوالی کا دورہ کیا۔
ترجمان پاک فوج کے مطابق جوانوں سے خطاب کرتے ہوئے آرمی چیف نے کہا پاکستان کی مسلح افواج قوم کی حمایت سے تمام خطرات کے خلاف مادر وطن کی سرحدوں کے دفاع پر توجہ مرکوز کیے ہوئے ہے۔
آئی ایس پی آر کے مطابق دورے کے دوران آرمی چیف کو فیلڈ مشق کے بارے میں بریفنگ دی گئی۔
فیلڈ ایکسرسائز کا مقصد آپریشنل ماحول میں مختلف صورتحال کے مطابق مستقبل کے چیلنجوں سے نمٹنے کے لیے مطلوبہ اور میدان جنگ کے تقاضوں کے مطابق پیشہ ورانہ مہارت کو بڑھانا تھا۔
آئی ایس پی آر کے مطابق آرمی چیف نے آرمر، میکانائزڈ انفنٹری، آرٹلری، ایئر ڈیفنس، اینٹی ٹینک گائیڈڈ میزائل سمیت مختلف عناصر کے مربوط جنگی ردعمل اور فائرنگ سمیت جنگی مشقوں کا مشاہدہ کیا۔
آرمی چیف نے تربیتی معیار، آپریشنل تیاریوں، افسروں اور جوانوں کے حوصلے کو سراہا۔
انہوں نے فوجیوں کو ہدایت کی کہ وہ روایتی جوش اور جذبے کے ساتھ قوم کی خدمت کرتے رہیں۔