آٹھویں چائنہ ساوتھ ایشیا ایکسپو، پاکستان نے کنٹری آف آنر کا اعزاز حاصل کرلیا

بیجنگ: پاکستان نے چین میں منعقد ہونے والی آٹھویں چائنہ ساوتھ ایشیا ایکسپو میں پاکستان نے کنٹری آف آنر کا اعزاز حاصل کرلیا۔

غیر ملکی خبر رساں ایجنسی کے مطابق چین میں پاکستان کے سفیر خلیل ہاشمی نے میڈیا سے گفتگو کرتے ہوئے کہا کہ چائنہ ساؤتھ ایشیا ایکسپو اقتصادی تعلقات کو بڑھانے اور علاقائی انضمام کو فروغ دینے کے لیے چین کی غیر متزلزل وابستگی کا ثبوت ہے۔

انہوں نے کہا کہ مجھے پاکستان کی متنوع مصنوعات کی نمائش دیکھ کر خوشی ہوئی ہے۔ جو ہمارے ملک کے بھر پور ثقافتی ورثے اور معاشی صلاحیتوں کو ظاہر کرتی ہیں۔

پاکستانی پویلین کی ایک خاص بات ڈاکٹر عدنان حفیظ کی جانب سے ایک ٹن سے زائد آموں کے متاثر کن انتخاب کے ساتھ تیار کردہ پاکستانی آموں کی شاندار نمائش تھی۔ جس میں تین قیمتی اقسام سندھری، لنگڑا اور ایس بی چونسا شامل ہیں۔

ڈاکٹر حفیظ کا مقصد چینی صارفین کو پاکستانی آموں کی مٹھاس اور تنوع سے متعارف کرانا تھا۔

انہوں نے کہا ہمیں امید ہے کہ اس طرح کے پلیٹ فارم ہمیں اپنے چینی صارفین کے قریب لائیں گے۔ جس سے ہماری مصنوعات اور خدمات کو مارکیٹ میں گہرا اثر ڈالنے کا موقع ملے گا۔

آٹھویں چائنہ ساؤتھ ایشیا ایکسپو اور اس کے ساتھ ساتھ 28 ویں چائنہ کنمنگ امپورٹ اینڈ ایکسپورٹ فیئر نے نیپال اور ملائیشیا سمیت 82 ممالک، خطوں اور بین الاقوامی تنظیموں کے 2000 سے زائد کاروباری اداروں کو اپنی طرف متوجہ کیا۔ یہ خطے میں اقتصادی تعاون اور ثقافتی تبادلے کو فروغ دینے کے لیے ایک اہم تقریب کے طور پر اس کی حیثیت کو اجاگر کرتا ہے۔