آئی سی سی چیمپئنز ٹرافی دا پشاور آمد تے گرمجوشی نال استقبال

اعجاز رشید

پشاور: آئی سی سی چیمپئنز ٹرافی دا پشاور آمد تے استقبال کیتا گیا۔ ایہہ ٹرافی سب توں پہلاں پشاور یونیورسٹی نوں پہنچائی گئی جتھے پشاور یونیورسٹی دے وائس چانسلر پروفیسر ڈاکٹر محمد نعیم قاضی، سیکرٹری پبلک ہیلتھ داؤد خان، ڈائریکٹر سپورٹس پشاور یونیورسٹی بحر کرم دے نال استاداں تے مقامی کھڈاریاں نے ٹرافی دی نقاب کشائی دی تقریب وچ رلت کیتی۔ طالب علماں نے ٹرافی دے نال تصویراں بنائیاں تے پی سی بی دے چیئرمین سمیت متعلقہ حکام دا شکریہ ادا کیتا. ایس موقعے تے یونیورسٹی آف پشاور دے وائس چانسلر نے آکھیا کہ کئی ورھیاں مگروں بین الاقوامی کرکٹ دا احیاء خوش آئند اے ۔ اوہناں موجب کرکٹ دی بحالی وچ سبھ نے اپنا کردار ادا کیتا، جہدے لئی اوہ سبھ دا شکریہ ادا کردے نیں۔ پڑھیاراں نے ایس موقعے تے دسیا کہ اوہناں نے ٹرافی نوں براہ راست ویکھیا تے تصویراں وی بنائیاں جو اک یادگار لمحہ سی۔

ایہہ ٹرافی یونیورسٹی آف پشاور توں بعد ارباب نیاز کرکٹ سٹیڈیم پہنچا دتی گئی. جتھے ڈپٹی ڈائریکٹر سپورٹس میر بشر خان، ڈائریکٹر ارباب نیاز کرکٹ سٹیڈیم سلیم رضا، صدر پشاور ڈسٹرکٹ ایسوسی ایشن اصغر خان، اے آئی پی ایس ایشیا دے سیکرٹری تے سینئر جرنلسٹ امجد عزیز ملک، ریجنل سپورٹس آفیسر کاشف فرحان، پڑھیاراں، مقامی کرکٹ کوچز تے ہوراں نے شرکت کیتی. ایس موقعے تے سلیم رضا دا کہنا سی کہ ارباب نیاز کرکٹ سٹیڈیم دی عمارت اُتے تعمیراتی کم تیزی نال جاری اے۔ تے ایہدے تے کم چھیتی ای پورا ہو جائے گا۔ اوہناں دا کہنا سی کہ حکومت کوشش کر رہی اے کہ آن والے دو مہینیاں وچ ایہدے اُتے کم مکمل کیتا جائے تاں جے ایتھے دے لوکاں نوں وی تفریح ​​دے موقعے مل سکن۔